نصائح خـــــــــاصة للمــــــخطوبات..........((..خـــشـــي يابنــتي مفــيش وقــت..))

آنستي العزيزة .. لو ربنا فك عقدتك .. واتخطبتي

فإليك نصائحي حتى تأخذي بخطيبك من مركب الخطوبة على إيه إلى مثوااااه الأخير في قفص النسانيس.. قصدي قفص الزوجية السعيد


أجمل ما في الخطوبة العزومات الرومانسية

على أحلى محلات أكل ف البلد.. واللي عمرك مانتي شايفاها بعد الجواز

نصائحي لك عند أي عزومة مع خطيبك .. تبقى رقَّيقه



الأول لازم تعرفي إن الشوكة والسكينة بيتمسكوا من إيديهم من الطرف
يعني مش م الوسط ولا م البوز زي الخنجر ولا من فوق طبعًااا

اولا .. الـعـيـش

أوعي تفضحينا وتقطعيه بسنانك

ولا الرغيف نصين بأيدك وكل نص لقمة وتحشري
أوعي.. العيش بيتقطع بالسكينة ف الطبق
وبعدين تاخدي لقمة.. لقمة.. بالعافية.. قال يعني نفسك مسدودة

اضغطي على أعصابك جدااا وبعدين لما تروَّحي
إبقي اهجمى على الاكل زي مانتِى عايزه



الـشـوربـة

أبوس كعب رجلك بند الشوربة ده مهم جدًاااا
الشوربة تتشرب من غير صوت خالص

ومن غير ماتقعدي تنفخي فيها.. زي القهوجي اللي بينفخ ف الحجر للزبون
وطبعًاااااا عايزك تنسى تمامًا السلطانية اللي بتحطيها على بقك ف البيت وتوقعي الشوربة على روحك

بالمعلقه وبدون صوت.. سخنة ولعة برضه بدون صوت .. وتسيبي تلت الطبق ع الأقل.. مش تلهطيها لآخر نقطة



الارز ... الرز يعنى

طبعاً .. بيتاكل بالشوكة
و أوعي إيدك تتمد ع المعلقة وتغرفي من طبق الرز وتعبي
الرز بالشوكة.. وكأنك بتبوسيه مش بتاكليه

المكرونة

برضه بالشوكة.. تتلف على طرف الشوكة.. لحد ما تخلص وبعدين تكلى من سكات .. مش تشفطي المكرونة عود عود




السمك

مشكلة انا عارف

شوفي بتفصلي اللحم عن الشوك.. إزاي..؟؟
تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة لا شيلي السلسلة بالشوكة والسكينة وحطيها ف جنب الطبق وكملي أكل النص التاني

وبدل الفيلم الهندي ده.. نصيحة.. ماتكليش السمك خالص

قولي مابحبش السمك وخلصي نفسك ولما تتجوزى ابقى كلى السمك زى منتى عايزة ان شاللة تكلى جوزك معاة





الـجـمـبـري
إذا كنتي عارفاه

أول ماطبق الجمبري ينزل بصيله بقرف واحتقار شديدين آل يعني زهقانة من كتر أكل الجمبري فى بيت بابا وأتنهدي جامد وقولي .. برضه..؟؟؟

وتروحي قاطعة راس الجمبريياية بالشوكة
أنا فى عرضك إنسي المصمصة دلوقت





الـبطـاطـس

سواء مسلوقة أو محمرة

أوعي تهرسيها وتدبيها ع الرز وتدي ...لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي



الـفـاكـهة

لو الفاكهة فيها بذر طلعيه من بؤك بالراحة وحطيه ف إيدك وهي مقفولة وبعدين ف طفاية السجاير اللي ع الترابيزه.. أوعي ياحبيبتي من نظام
التفتفة للبذر .. إنسي






ولما تخلصي أكل تحطي إيدك على بطنك

اللي عصافيرها بتصوصو من العينات اللي كلتيها وتقولي له

مش ممكن أنا عمري ما اتفجعت كدة .. أنا أودامي أسبوع هابطل أكل فيه

وبعدين تمسكي الفوطة اللي دايمًا موجودة ع التربيزة من غير لازمة وتبوسيها
آل يعني بتمسحي بؤك



وبعدين تستأذني منه لدخول التوليت لإصلاح ماكياجك

وتخشي التواليت وتطلعي من شنطة إيديك
لفة الفول والطعمية اللي جايباها معاكي

وبالهنا والشفااااااااااااا