حزنك بيألمني
٢٣/٨/٢٠٠٨
قاعد بتأمل فيكي.. ألاقيكي
شايلة الكون فوق صدرك وبتبكي
وبكاكي بكَّاني معاه
والليل طال الليل... آه م الليل
غارز ضوافره في قلبك
غارز ضوافره ف ناسك
داس إحساسك
والليل طال الليل... آه م الليل
جرح قلبك ورماه جنبي
خدته ف حضني
يا آآآه
جرح قلبك كبير أوي
ليه لما جيت أطببه ما سعدتنيش
وليه لما بحاول أكلمك مابترديش
وليه لما أحب أقابلك بتأمريني
أخلع مداسي
وأمشي علي طراطيف إحساسي
علشان ليلك ما يسمعنيش
علشان جرحك ما يألمنيش
آه ياني آه
عيني عليكي لما بتقولي الآه
عملت رمش عيني حوايه
وشلت أحزانك
حزنك ما هوش رباني
حزنك نفس أحزاني
حزنك محزمني حزنك بيألمني
بيألمني بيألمني
السبت 23 أغسطس - 19:08
